కావ్యమనగనేమి? కవితార్థమదియేమి?
కవుల కల్పనందు కలిమియేమి?
కల్లలెరుగనట్టి కమనీయభావాల
కదలు మాటగాదె కలిమి యనగ.
కలిమి పొందలేక కవితయై కదలాడు..
కలసి పంచుకొనగ కావ్యమగును.
20, జులై 2010, మంగళవారం
7, జులై 2010, బుధవారం
చిత్రము
మిన్నుల తారక మెరయగ
కన్నుల కదలాడె మోము కమనీయమ్మై,
వీనుల విందుగ వింటిని
తేనియలూరెడు స్వరములు తీయని మదిలో.
కలదను భావము కదలగ
కలబోసెను మధురోహల కవనములెన్నో,
కలగా మిగిలెను కలయిక
కలవరమందెను హృదయము కన్నీరొల్కెన్.
చల్లని వెన్నెల చి౦దెడు
కలువలరేడైన గాని కలవర మొందున్,
నల్లని మబ్బులు క్రమ్మిన
చెలికత్తెను చేరలేక.. చిత్రము గాదే!
28, జూన్ 2010, సోమవారం
ఆత్మీయులు...
(వివిద రకాల మనుష్యులు, మనస్తత్వాలు చూసినపుడు నాకనిపించిన భావం ఇలా... )
నేను నేననువారు, నీవు నీవనువారు
వెలయుచుండిరిచట వేలవేలు,
నేను నేనేయంచు నీవేమి కాదన్న
వీరులున్ గలరయ్య వెతికి జూడ,
మనము మనమనుచు మాటలాడెడివారు
మానవమతులు యిమ్మహినగలరు,
మాటలాడగబోవ మాకేదొయగునంచు
పట్టనట్టియువారు పలువురుండు.
ఇట్టిఘనులు ఇంక ఎందరున్నను గాని
నీవు నేనె, నేనె నీవు యనుచు
అంతరమ్మెరుగని ఆత్మీయులే కద
భువిని దివిగ జేయు పుణ్యమతులు.
17, జూన్ 2010, గురువారం
శుభాకాంక్షలు
ఈ రోజు నాకు ప్రియమైన, నా చెల్లెలు పుట్టినరోజు. నా చెల్లెలికి జన్మదిన శుభాకాంక్షలతో.......
తీయని నీ జీవితమున
మాయని మమతల మధువును మది నింపగా,
హాయిని గూర్చును సతతము
ఆయుష్మాన్భవతి.. యంచు ఆశీస్సులివే.
12, జూన్ 2010, శనివారం
7, మే 2010, శుక్రవారం
మల్లె మనసు
చిన్నారి చిందించు చిరునవ్వు సిరిమల్లె
కలల కన్నెమనసు కాడ మల్లె.
లేతభావమ్ముల లేలేత పూతలు
ప్రతిఫలింప జేయు పసిడిమల్లె.
వలపు వన్నెలు చిందు వనిత మదిని పొంగు
ఊహలందు విరియు బొండు మల్లె.
తనువు తాపమునంత దరికి చేరగజేసి
దూరమ్ము చేయునే దుడుకు మల్లె.
మల్లె మనసు జూడ మమత విరియ జేయు
మమత విరియజేయు మనసు మల్లె.
మల్లెపూవు వంటి మనసు కలిగెనేని
మదిని విరియు నెపుడు మల్లె తోట.
3, మే 2010, సోమవారం
సుమిత్రా....
ఇనుడస్తాద్రికి జనుచున్
గనె నా హ్రుద్ఫలకమందు కాంతులనేవో,
తననే మించుచు వెలిగెడు
నినుగని మురిసెన్ యచ్చట, నిజము సుమిత్రా!
దీనికి సబ్‌స్క్రయిబ్ చేయి:
పోస్ట్‌లు (Atom)